Garo Hills Autonomous District Council (GHADC), CEM-ni 15th Finance Commision Co-ordination Committee-ni tom∙bimonganiko mijal salo ong∙atgipao Tura Municipal Board-ni official-rang bakko ra∙janina Tura-ni MDC Bernard Marak matnangataha. Tom·bimonganio bakko ra∙gijaniara 15th Finance Commission-ni dongimin niamrangko pe∙ani ong∙a ine Marak aganangaha.
Ia tom∙aniko dingtangmancha 15th Finance-ko jakkalani bidingo pilak project-rangko chanchirimna aro dakna nanggni kamrangko che·eme golporimna miksonge tik ka·angaha. June 27 chong·motan Bristibar salo CEM-ni office kutturiona tom·bimongna okamanio TMB-ni CEO bakko ra·jaha ine Marak parakataha. Iarangni bidingo ua Deputy Chief Minister aro District Council Affairs Minister Prestone Tynsong-naba janapataha ine Marak aganangaha.
Marak-ni parakatanigitade batanggimin chango, Municipal department GHADC-na u·iatgija chamatgimin tangka paisarangko jakkalangaha ine aganangaha. Indake dakaniara, February 2 tariko 15th Finance Commission-ko songna manchigiminni niamrangko pe·ani ong∙a ine Marak janapataha. Iani bidingo aganchakchina Municipal-ni CEO-rangko okamatahaoba darangba sokbajaha ine Marak agandapangaha.
TMB-ni indake ua biapni MDC aro GHADC-ni raiko senggija skatang dakani a∙selo pilak janapatako man·gimin kamrangko den∙galchina aro tangka on∙aniko dontongatchina Bernard Marak, Deputy Chief Minister aro Council Affairs Minister Prestone Tynsong-ko mol∙molan baksa iani bidingo ta∙rake nirokatchina didiangaha.
