WGH, Damal A·sim pulis thana-ni ning·o man·gipa Lower Teksragre songo me·chik saksako ka·saninggija dake doka satanio jak donggiparangko pulis dolrangni am·sandianio sakgniko rim·na man·angaha. Iamang baksa dokanio jak donggipa sakgni manderangde songoni gipin biapchi kate dongenga ine koborna pulis dolrang parakataha.
Sanna bannani niamgita porikka ra·e nianirangko matchotaha aro a·selni ja·pangko sing·sandianirangkoba dakangaha. Ia mamlani bidingo nanggipa kamrangko dakangkuenga aro pilak manderangkon video-ko giproroatpajachina Deputy Commissioner Jagdish Chelani parakataha. Indake dakanichi doka man·gipa mandena namgija bimungko ra·baan baksana police rangni am·sandianiko dakanio neng·nikani ong·naba gnang ine DC aganangaha.
