A·dok sorkari Reservation Roster-na tik ka·e dongimin niamrango pangchake sorkarini kamrangna rimnapanio jat gittamna apsangrik sualgiminko namedake ja·rikjaenganina Rongrong-ni MDC Rinaldo K. Sangma matnangataha.
Meghalaya sorkarini Planning department-ni kamna seokako man·giparangko March 20, 2023 tariko parakatanigitade sak 20 research officer-rang gnang. Ua sak 20-oni A·chikrangde sak 4 san aro Khasi-Jaintia jatrangsa sak 16 seokako man·angaha ine Sangma janapataha. Reservation roster-ko High Court-ni ge·etanigitade kamrangna rimnapanio A·chikrang komibatanigimin A·chikrangnasa bang·bate on·a nangani gisepon Personnel AR department-ni Khasi-Jaintia jatnasa bang·bate seat-rangko advertise ka·skaaha ine Sangma aganaha.
Indake ong·ani gisepon MPSC result-ode A·chik sak 1 Khasi-Jaintia sak 3 kosa niksonagita man·aha aro pangnaba un-reserved-ni biapkode A·chikrangde man·srangja maina A·chikrangde uamang baksa susaana sokdopakuja ineba Sangma janapangaha.
Ia pilakan an·chingni A·chik jatna aro jerangan poraia skia matchote kamna senge dongenggipa sakantinan kakketgijani ong·enga aro iarangko name niate, Meghalaya Job Reservation policy-ko nipiltaianiko dakgenchimode A·chikrangkosa bang·bate kamna rimnapna nangani ong·jaengama ine Rongrong-ni MDC Rinaldo Sangma sing·doangaha.
