Meghalaya Awaken Council Citizens (MACC)-ni dilgipa Banshai Marbaniangni Bristibar attamo Polo-chini re∙bapilmiting somoio, nosto ong∙gimin samrang aro dingtang dingtang sanna-banna jakkalgipa bosturangko Municipalni Truck gario gatako nike ja∙rike nion jabol galchakram biapchina galna ra∙angako nikaha ine ua u∙iataha.
Marbaniangni matnangani gitade ua gari sorkarini sam donchakram biaponi ong∙katbaengachim jean Ganesh Das Hospital sepango ong∙a. Samrang jekai Escitalopram tablets IP 20 mg, Sodium Valproate Gastro-resistant Tablets IP 200mg, Cefotaxime Sodium Injection IP and Citalopram Tablets IP 10 mg aro una agreba banga dingtang dingtang samrang uno gnangchim.
Batanggimin salrango PHC, CHC rangna sam, biji aro driprangko sualanio chu∙ongijanina badi ka∙anirangko a∙doko nikna gita man∙genchim ong∙oba indake samrangko galna nang∙aona sokaniara aiao inmanani aro ra∙chakna am∙gijani katta ong∙a ine ua agandapanga. Ru∙utgija somoion uamang iani bidingo a∙dokni Health Minister Ampareen Lyngdoh aro DM&HO aro gipin official rangko am∙sandie talate on∙angchina badi ka∙angen ineba u∙iatangaha.
