South West Garo Hills-o District Horticulture Office, Ampati-ni ning·o Centre of Innovation for Sustainable Livelihood Development nokko rikmanani bilsi gittam mang ong·piloba chalaigija galchipe donenganina AHAM, South Western Zone ni President Wester G. Sangma a·jani Deputy Commissioner na chitti see u·iatangaha.
Ia Centre of Innovation for Sustainable Livelihood Development Building-o kamrangko a·bachengate on·genchimode a·jani chadambe aro songdongenggipa manderangna dingtang dingtang skie ra·ani cholrangko on·an baksana a·jani tang·doanina dakchakani ong·gen ine Sangma janapangaha.
Ia Centre a·jani manderangna janggitangani cholrangko skie ra·nagita mongsonggipa a·dam ong·a. Ia centre-o game ge·e cha·gipa, chonchongipa bading chiwalgipa aro songsalni manderangna janggi tangna pangchakaniko on·anggen ineba Sangma janapangaha. Ia centre a·jao songdongenggipa manderangni ru·utbea bilsirangonin namgniko man·a sengsoe dongenggipa ong·a. Uni gimin ge·e game cha·giparangni palo ia centre ko ta·rake a·bachengate on·agita nanga ja·kurangko de·e kamrangko ka·china DC ko Sangma mol·molataha.
