Meghalaya a∙doko mikka jimbee waanio dam 171 songrangni sak 9577 manderang neng·nikanirangko chagrongangaha. Chi bana ong·ani a·sel ge 135 nokjamrangni nosto ong∙anikoba niknagita man∙angaha. Batanggimin antisao mikka jimbee waani a∙sel ge 46 nokjam, building-rang aro 27.303 hectare a∙a chiarang rusiatako man∙aha.
Garo Hills-ni a∙jarangoba apsan daken mikka waani a∙sel bang·a nosto ong∙aniko man∙aha. East Garo Hills-o dam 13 songrang jeon nokking ge 92 rangoni ge 6 nokrang chu·gimik nosto ong∙atako man∙aha aro ge 18 nokrang adita nosto ong∙aha. Je nokdangrangni nok nosto ong∙ako man∙giparangna tangka chamatako man∙a skang baditamancha nosto ong∙ako name nichengani ja∙manosa tangkarangko sualanggen ine parakataha.
South Garo Hills-o chi bana aro a∙a ruronga baksana bijoliko den∙ani a∙sel manderang neng∙nikaniko chagrongangenga. Karukol Jalaigre Lower Primary school-o relief camp-ko tarie nokking ge 7 ni manderangko donenga. Darang Boldak-o man·pakanggipa rama rangko senggnang taritaichina Executive Engineer PWD Road-ni jako pakwatangaha. Siju Ganggagittim-ni rama jean bang∙gija nosto ong∙gimin ramako June-ni 17 tariko PWD tarimanaha aro Rongsa A∙we jolo a∙a ru∙ronggipakoba PWD ramarangko talate on·aniko niknagita man∙aha.
South West Garo Hills-o, ge·gni nokrang a∙a rurongani a∙selo nosto ong∙atako man∙aha. West Garo Hills Tura-o Dharamsala-o donggipa nokdang ge·brini manderangko relief centre-ona rimangaha. North Garo Hills-o dam 15 songrang jeon mande gimik sak 132 aro nokking 32 oniko ge 30 nokrang aditan nosto ong∙aha aro ge·gni nokrang chu·gimik nosto ong∙aniko man∙aha.
