Garo Hills-o mikkarang jimbee waanganichi Resu-Mendi ramako salantio re·ruragiparang neng·nikaniko chagrongenganina sorokko tarienggipa Badri Rai company-ni kosako Social Activist, Cherian Momin matnangataha. Ia rama mongsonggipa ong·genchimoba Badri Rai company-ni ka·sine kam ka·anichi songdongenggipa manderangna, skul bi·sarang, college, office re·giparang aro bading chiwale cha·giparangna re·na dona champengatako man·aha. Garo Hills-o ia company-ni jako ra·e kam ka·gipa project-rang bang·bataan namgipa kamrang ong·ja ine Momin parakataha.
Songdongenggipa manderangna salantio maming neng·nikaniko ra·bajachina dingtang ramako re·rurana jakkalskachina Momin daito donggiparangko ta∙rake sandie watchina didiataha. Ia ramao tarienggipa dolongrangko ta∙rake tarie matchotatchina aro Badri Rai company-ni kamrang namjagenchimode rakgipa niamrangko donchinaba Momin janapataha. Unbaksana, mikkangchi indakgipa a·selrangko chagrongjanagita kamrangko simsake aro nambate ka·chinaba Momin songdongenggipa manderangni palo mol·molataha.
Apsan daken A∙chik Progressive Approach (APA), North Garo Hills Dainadubi Regional Unit-ni President Selbistone Momin ba Mendi-oni Resu re∙gipa ramani ong∙gipa obostani bidingo matnangataha. Uni agananigitade ia dolongko rikanio kamrangko ru∙utanina aro chonbegipa culvert mangmangko on∙anian rika cho∙anio chu∙onggijaniko nikna man∙a ine Badri Rai Construction company-ni kosako suk ong∙gijaniko parakataha.
PWD Department-ni SDO-ni parakatanigitade jako ra∙enggipa company-ni rika cho∙ani kamrangko simsakgijani a∙selsa ong∙aha ineba APA dolrang janapataha. Unbaksana ia company-ko department-nigita kamrangko ta∙rakatchina re∙anggipa sal somoirangonin didiatmanahaoba uamangni pa·sike ru∙utatani a∙selo da∙o wachi kario indakgipa obostarangko jang·nangna nangao soke manderang neng∙nikaniko man∙tokenga ineba u∙iatangaha.
