South West Garo Hills a·jao District Sports Office ni ong·atanggipa District Level Inter School Subroto Mukherjee Cup 2024 ko Ampati-ni Students’ Field o bon·kame kalsu·saate name matchotangaha. Ia Subroto Mukherjee Cup o bilsi 15 aro 17 ni ning·o ong·gipa me·a bi·sarang aro bilsi 17 ni ning·o ong·gipa me·chik chadamberang kal·susaangaha.
Ia kalsu·saanio bilsi 17 ni ningo ong·gipa me·chik dolni su·saanio Okkapara Secondary School nambate kalanichi skanggipa biapo chenagita man·aha aro apsan skulni Anggilchi Mirza G Sangma susagiparangoni nambatgipani boksis ko che·aha. Springfield Higher Secondary School gnigipa biapko che·angskaaha.
Apsandake bilsi 17 ni ning·o ong·gipa me·asa dolni susaanio Okkapara Secondary School skanggipa biapko che·tainagita man·aha aro Rongsang Abagre Secondary School gnigipa biapko man·e apsan skulni Limilo Ch Momin susagiparang gisepo nambatgipani boksis man·aha.
Bilsi 15 ni ning·o ong·gipa me·asa dolni susaanio St. Claret Higher Secondary School skanggipa biapko man·e apsan skulni Pangkim M Marak nambatgipa ong·e boksisko man·aha aro gnigipa biapko Betasing ni Emmanuel English School chenagita man·aha. SWGH District Level Inter School Subroto Mukherjee Cup 2024 susaanio chegipa dolko State Level Inter School Subroto Mukherjee Cup-o a·jani palo kal·susana cholko man·angskagen.
