EGH Dobu Primary Health Centre (PHC) o ta·raken doctor skasako nangdapenganiko janapate, Dobu jolni A·chik Holistic Awakening Movement (AHAM) dolrang songdongenggipa manderangni palo District Health & Medical Officer (DMHO) na chitti sedoataha. Ia PHC-o salantio an·o donggipa, rang·gitik a·sel ong·anio sanna nanggipa aro gipin official kamrangko nirokna nangani a·selo doctor saksasan ong·e somoirang apchangket ong·e sanna bananio namedake dangdike on·a ba niroknagita man·jaenga jeni a·selan bang·gija sagiparangko nirokatna man·jaenga ine chittio janapataha.
Ia PHC wilwilao songdongenggipa manderangna sepangbatgipa aro nangchomotgipa ong·a maina Williamnagar Civil Hospital-ona re·nagita namen chel·begipa ong·a. Indake doctor saksasan ong·e basakoba rang·gitik a·sel ong·anirango saknaako man·gipa mandeko PHC-ona rimbae ta·rake nangchongmotgipa sanna bannaniko on·a man·jagenchimode mandeni janggina namen kenchakani ong·a ine AHAM dolrang janapataha.
Indake ong·engon jolo songdongenggipa manderangna salantio nambate sanna bananiko dangdike on·a man·agita doctor saksako nangchongmotenga ine AHAM dolrang janapataha. Ia pilak obostarangko niate daito donggipa officer-rang iani bidingo ta·rake nirokatchina aro jolo songdongenggipa manderangni namgnina kamrangko ka·china AHAM dolrang mol·molataha.
