Batanggimin salo South West Khasi hills a·jani Nonghyllam Police Station-ni ning·o ong·gipa songo bilsi chu·ongkugijagipa A·chik me·chik bisa sakbriko drae til·ekanina a·jani bakrimgimin dingtang dingtang skulni chatro chatrirang, Sordar, Mother’s Union, Garo Students’ Union (GSU) aro A·chik Holistic Awakening Movement (AHAM) dolrang dosi donggipa manderangni kosako kakket bichalona ra·bachina da·al salo re·jomangaha.
Iani bidingo Protection of Children from Sexual Offences (POCSO) Act-o pangchake pulis dolrangna badi ka·angahaoba da·onaba dosi dakgipa manderangko rim·kujaengani gimin NGO dolrang matnangan baksana daito donggipa officer-rangko nanga ja·kurangko de·e ta·raken am·sandianiko dakchinagita didiangaha.
Meghalaya a·doko nokona me·chikko done chatchiko de·gipa ong·ani gisepon indake kragija kal·ake roanirangara a·dokko ong·siataona ra·baani ong·a ine aganangaha. Unbaksana dosi donggipa manderangko kakket bichalona ra·bae on·kugijaniara a·doko jingjengataniona ra·baan baksana a·dokni silroro namroroaniko nosto ka·aniba ong·a ine NGO dolrang aganangaha.
