Tura Football League-o Division II ni dolrangoni Doreng Sporting YC aro Ganolgre Sports YC-ni da·alo susagrikanio dolgnian goal prakko chipna man·e biltinggrik ong·enba apsan point-rangko man·angaha.
Ganol Sports Youth Club dolna Brimen T. Sangma skanggipa half-o minute 20 ni gisepo chipaha. Ganol Sports YC, skanggipa goal-ko seng·gnang chipna man·ahaoba Doreng Sporting Youth Club-ni rakbee kal·anichi goal-ko chipdapna cholko man·jaha.
Ia kal·anio Doreng Sporting YC dol rake kal·ange skanggipa half-o goal chipna jotton ka·beoba man·jaha. Uamang doloni Cherrybirth Ch. Marak gnigipa half-o Sengku Ch. Marak-ni bodol napskae minute 70 ni gisepo doltangna goal 1 ko chipe on·angaha. Uni goal chipanichi Doreng Sporting YC dolko ia susaanio apsangrik ong·na dakchakaha.
Indake susaanio goal prakkosan dolgnian chipna man·anichi da·alni kal·anio darangba chegipa ong·jaha aro point-rangko apsan sualangaha.
