South Garo Hills a·jao District Legal Services Authority (DLSA) dingtangmancha National Legal Services Authority (NALSA) ni dakchakaniko man·e ”World Day Against Child Labour ” ko Baghmara antidamo ong·atangaha.
Baghmara-ni Labour Inspector Sengrik R. Marak, program-o bak ra·giparangna bilsi chu·ongkugijagipa bi·sarangko kam ka·atani bidingo niam bidikrangko manderangna talatangaha. Bilsi 14 ni ning·o ong·gipa bi·sarangko dokanrango aro karkana-rango kamrangko ka·na on·a man·jawa, saoba ia kamrangko niamgri bi·sarangko ka·atgenchimode hajal 20 oni hajal 50 ona tangka gamna nangan baksana ja 6 oni bilsi 2 ona kraagita sastirangko man·gen ine Marak aganangaha.
Dal·dromiting bi·sarang kamrangko ka·e skul re·aniko dongtonggija ka·genchimode child labour-ni ning·o ga·akja. Indake ong·genchimoba je ma·a paarang bilsi 15 oni 18 na komigipa bi·sarangko kamrango rimnape ka·china draatgenchimode hajal 10 tangkarangko gamna nangan baksana ja 6 oni bilsi 2 ona pattoko dongna nanggen ine Marak u·iatangaha.
A·gilsakni bang·a bakrangon bi·sarangko kragija jakkalaniko, badinganiko aro kamrangko ka·ataniko ICPS-ni Outreach worker Chalak Marak aganangaha. Bi·sarangko naljoke rakkiani skanggipa nokni manderangoni a·bachenga aro indake uamangko kragija jakkalanirangko champengnagita apsan nangrime kamrangko ka·angnaba Marak didiangjolaha.
