Samanda Dolwarigre CMYC uamangni skanggipa exhibition-ko re·anggipa June 8 tarik Sonibar salo maniangaha. Ia exhibition-o mingsni project-rangko nikangna man·aha jeon bang·a manderang an·tangtangni changa sapanirangko mesokahangaha.
Ia mingsni changa sapanirangara Eco Basri jean galgimin ba·rarangko jakkalpiltaie cushion-rangko tariani, Chingdo ba jaktangchi mombati-rangko tariani, Knots & Threads jean kildingrangko kastee pakmarango chabi ba botolrangko sitena tariani, Grenang Soap jekon modipol, holdi aro bija bitchi baksa brine tarigipa sabon, Bibi’s Art jean bilsi 20 ong·gipani chadambeni noksa salani, Ambini Jakma jeon bilsi 54 ong·gipa ambi skie ra·na bilsi dongja ine mesokani aro A·chik Kotip project jean A·chik jatrangni kotipko ripinge rakkina miksonge tariani ong·a.
Ia exhibition-ona EGH ni ADC Dimseritha Sangma mongsonggipa ong·e sokbaan baksana St. George Samanda-ni Principal Fr. Jimbert Marak, Kasturba Gandhi Balika Vidyalaya-ni Headmistress Sister Bindu aro Village councilni dingtang dingtang manderang sokbae bakko ra·angaha.
