2024 Lok Sabha election-o Gambegre Constituency Congress dolni Saleng Sangma, NPP-ni gitcham MP Agatha Sangmako bang·a vote-rangchi amchepataha. Ia gital seokako man·gipa MP Saleng Sangma New Delhi songjinmaona re·ange Parliament Annex-o Tura Constituency-ni MP-ni kamko jako ra·na bimingtangko segatangaha aro ku·mitchetaniko dakna skang Gambegre MLA ni kamko da·al salo watangaha.
Saleng Sangma gital MP ong·an baksana Gambegre Constituency-ni MLA-ba ong·engani gimin sorkarini don·gimin niamogita je MLA-ba MP election-o chegenchim ong·ode sal chi·brini gisepon ge·sa kamko watna nangao ga·aka.
Sangma-ni election-o cheaniara Garo hills-o Congress dolna tang·dobataianiko ra·baani ong·a aro Shillong-ni biapo Congress dol chena man·jahaoba VPP dolrang NDA baksa bakrimgija opposition-o dongna tik ka·aniara Congress dol baksa bakrime kam ka·angna namgipa chol ong·anggen ine Congress-ni dilgipa Manuel Badwar aganangaha. Unbaksana Congress party Lok Sabha election result-ni bidingo chanchirimna ta·raken Executive Committee tom·aniko dakanggen aro Meghalaya-na state President dingtangko songani bidingo maming chanchirimaniko dakanggija Vincent Pala-kon state President-ni kamko jako ra·e kam ka·na on·angkugen ineba Badwar agandapangaha.
