South West Garo Hills, Ampati-ni Integrated Farmer’s Market-ko bilsi 6 na skangan oprake on·ange manderangni nichaksoe dongenggipako da·al salni bako kamrangko ka·na a·bachengate on·angaha.
Ia bajar-ko kulie on·a Garo Hills Autonomous District Council-ni (GHADC) CEM Albinush Marak aro South West Garo Hills-ni District Horticulture Officer Balsrang Sangma baksana South West Garo Hills-ni Deputy Commissioner nangrime da·alo a·bachengate on·angaha. Una agreba GHADC-ni Executive Member aro Boldamgre-ni MDC Stevie Marak, Dalu-ni MDC Pramod Koch, Betasing-ni MDC Sanjay Koch, dingtang dingtang Officer-rang, GHADC-o kam ka·giparang, songtangni ge·e game cha·giparang, pale sim·e cha·giparang baksana Ampati bazar-ni Committee-rangba dongpae bakko ra·angtokaha.
Ia bajar-ko a·bachengnagita project-rangko matchotanio bang·a neng·nikanirangko man·ani a·selo ru·utatna nangao ga·akaha. Ia gitalgipa bajar-ko kulie on·anichi songdongenggipa manderangna an·tangtangni ge·gimin bosturangko pala sim·anioba jajrenga gri palnagita man·gen ine CEM aganangaha. Unbaksana songtangni ge·e game cha·giparangko bosturangko nambate palanirangko dakna dongkuenggipa biaprangko pararangko ra·e palaniko dake ge·a gamaniko nambatatnagitaba didianiko on·angjolaha.
Ge·a gamanirangko aro chirangko ripinge tange rakkie janggi gnanggiparangko nosto ka·gija daito ra·e sam jakkalaniko komiatna aro samtangtango dongengiparangko naljoke rakkina MDC Pramod Koch aro District Horticulture-ni Assistant Director (Marketing) Balsrang Sangma aganangaha. Unbaksana bang·a ge·e game cha·anio aro palanirangko dakanio namgipa cholrangko on·an baksana kam ka·e cha·naba cholrangko ra·bagen ine Salbinson Sangma aganangaha.
Ia Integrated Farmer’s Market-ko 2013 bilsini May 30 tariko memorandum-ko on·e GHADC-na March 31, 2018 o jako ra·na on·angaha. Ia bajar-ko adita taridapna nanganirang dongani a·selo ru·ute sengnagita nangaha ineba u·iatangaha jeon Block A-o kutturi ge 105 donga aro Block B-o ge 51 kutturirang donga.
