Tura, ISBT o 2-Tura seatna Lok Sabha election 2024 ni vote rangko chanani 3 bajiona matchotja dipet candidate ko ja·rikbaenggipa pilak party rang aro election agent rang gari bang·e ra·napna man·jawa ine Deputy Commissioner Jagdish Chelani u·iataha.
Susaenggipa manderangni aro official ni garirangna neng·takate dona tarigimin biapo donchina DC parakataha. Vote rangko chane chegipako parakatja dipet pring 7:30 bajioni ISBT ning·ani pilak biaprangko ja·achisan re·na man·aigen ine ua janapataha.
Vote chananiko name matchotatna man·agita pilak manderangkon donsogimin somoirangoni niamko ja·rikpachinaba DC sakantikon mol·molataha.
