West Garo Hills Babadam songo A·chikrangni dakbewal rikbewalrangko am·sandie ripinge rakkinagita sorkarini on·gipa Tribal Research Institute nok building-ko ru·uta bilsirangonin galchipe donenganina songdongenggipa manderangni u·iatako man·e biapona re·ange nike Niksamso Garo Community Organisation (NGCO) H.Q. Simsanggre suk ong·gijaniko parakataha. Ia nok buildingko jako ra·e kamko ka·enggipara Ten on Ten (TOT) company ong·a jekon kamrangko matchotatgija galchipe donenga ine u·iatangaha. Apsan daken indake kamrangko ka·na gisik nanggijagipa company-rangni jako on·an baksana sorkarinigita nirokataniko dakjani a·sel ong·enga ine janapataha. Indake ong·engon ia project-rangko ta·rake matchotatna nangnikjae kamrangko ka·gija galchipe donengama ma jako ra·gipa company-rang tangka paisarangko jakkalsretesa donchipengama ine NGCO dolrang sing·doangaha.
Ia Institute-ko rikna gong 42 crore tangkarangko chamatmanahaoba da·alona kingkingba rika cho·anirangko matchotatgija oprake on·e donchipenga ine janapataha. Unbaksa indake kamrangko tik ong·gija ka·gipa company-ni jako on·aniara aro rika cho·aniko matchotkujaon oprakmangmange galchipaniara A·chik jatko togianisan ong·aigija garo Hills-ni silroro namroroaniko nisiataniba ong·a ine NGCO dolrang matnangataha.
Iani bidingo a·dok sorkari bakan nirokate kamrangko ka·na gisiko nanggijagipa company ba contractor-rangna jako ra·na on·gija donan baksana nanggipa ja·kurangko de·e contractor-ni kosako kragipa sastiko on·china NGCO dolrang didiangaha.
