Garo Hills ni adita a·jarango chong·motan West Garo Hills, South Garo Hills aro South West Garo Hills o June 2 tarikona mikka jimbee wana amaniko India Meteorological Department (IMD), Shillong u·iatsamsoaha. Ia somoio mikka kimpretani aro il·lipanirangba donggen ine IMD oni parakataha.
Mikka waan baksana bilakgipa balwa jean 40-50 kmph mangni tarakao rakanggen ine parakataha. Unbaksana, a·dokni gipin bakrango jekai East Khasi Hills, East Jaintia Hills, South West Khasi Hills aro West Jaintia Hills o apsan obostarang chagronganiko u·iataha. Pilak songdongenggipa manderangko ia somoirango simsake dongchina State Disaster Management Authority (SDMA) aganangaha.
