Garo Hills Chess Association (GHCA), 47th Fide Rated State championship-ko Asanang Wangala Hall-o re·baengipa June jani 12 oni 15 tarikona ong·atna gita tarisamsoenga ine u·iatangaha. Ia tournament an Meghalaya a·doko chessni itihas o skanggippa changna State championship-ko Fide Rated ong·atenga aro iano kal·susana a·dokni gipin a·jarangoni bakko ra·ange a·dokni nambatgipa chess kal·giparang baksa susanaba cholko on·anggen.
Ia tournament o bakko ra·nagiparang East Garo Hills, North Garo Hills aro West Garo Hills a·jani ong·genchimode GHCA player registration fee gong 300 ko gamna nanggen indiba bilsi 18 ni ning·o ong·giparang gong 150 kosan gamna nangaigen. Ia registration ko ka·giparang GHCA o registered players ine chananikoba man·gen aro mikkangchi GHCA ni ong·atgipa tournament rango entry fee mangmangko game kal·angna man·skagen ineba parakataha.
Ia registration ka·ani somoiara March 2025 ona baian baksana All India Chess Federation (AICF) o gong 300 on·e register ka·na nanggen aro register ka·gimin ong·ode iako 2024 oni 2025 ona renew ka·na nanggen. Ia pilak kam rangko ka·esa tournament o bak ra·na entry fee ko gamna man·gen jean gong 600 ong·a. Talbate ma·sie ra·na sikgiparang GHCA ni Media & Publicity Secretary Silkam Sangma (8837242771) aro GHCA ni General Secretary Tengrang R Sangma (8131851630) na ka·ate sing·nagita man·gen.
