Captain Williamson Sangma State University-ko a·doko chalaina, University Grant Commission (UGC) ni ra·chakaniko man·a a·dok sorkari nanggipa kamrangko ka·na a·bachengataha ine Education Minister Rakkam Sangma parakataha. Jensalo UGC ra·chakaha pilak a·dokni college-rangko ia gitalgipa university-o bak ong·atna a·bachengatgenok ine Sangma aganangaha.
Indake university-ko a·doko a·bachengatna ja·ku de·e kamko ka·aniara jemangan Central University rango poraina sikgijagipa aro CUET porikkarangko sena neng·nikenggipa chatro chatrirangna dakchakani ong·anggen ine Sangma aganangaha.
Unbaksana MBOSE ni class XII result-rangko man·tokahani gimin gital degree college-rang chong·motan Ri-Bhoi o Patharkhmah degree college aro EGH-o Rongjeng degree college-rango admission-ko ra·na a·dok sorkari ru·utgija somoioni gisepon parakatgen ineba Sangma agandapangaha.
Ia gitalgipa ge·gni degree college-rango Bachelor of Arts (B.A) degree-ko on·chenge ia bilsionin chalaina a·bachenggen jekon iani bidingo salsa ba salgnini gisepo bon·kame u·iatanggen ine Sangma parakangaha. Una agreba Lok Sabha election-na Model Code of Conduct ko ra·galani ja·man ia ge·gni college-rango Principal-ni kamna rimnapaniko dakanggenok ineba Sangma parakangaha.
