South West Garo Hills-ni District School Education Office (DSEO), Ampati Springfield Higher Secondary School-o District Level Science, Mathematics aro Environment Exhibition-ko chatro chatrirangna ong·atangaha. Ia exhibition-ko “Science & Technology” katta bichongko done ong·atanio a·jani ge 10 skulrangoni chatro chatrirang re·bae bakko ra·angaha.
Exhibition-ko ong·ataniona Ampati Govt. Higher Secondary School-ni retired Vice-Principal K R. Marak mongsonggipa ong·e sokbaaha aro a·jani DSEO Incharge T Ch. Marak, Betasing-ni Block Mission Co-ordinator S N. Sangmaba dongpae bakko ra·angaha. Program-ni somoio Mathematics aro Science subject-rangna kenjachina aro ia chasongo janapgimin subjectrangni gamchatani bidingo K R. Marak chatro chatrirangko didiangaha.
Unbaksana ia exhibition-o susaatanio St. Claret Higher Secondary School skanggipa biapko man·angaha jean South West Garo Hills a·jani palo State Level Science, Mathematics aro Environment Exhibition-o bakko ra·na cholko man·anggen. Hari Shanti Niketan School gnigipa biapko man·aha aro Good Shepherd gittamgipa biapko man·angskaaha.
