West Garo Hills o mingsinggipa Pelga Dare o da·al salni 2:30 bajimango mande saksa chio napsrime siangaha. Sianggipa mandeko Tura Walbakgre ni bilsi 45 mang batgipa Shisil S. Sangma jean Doordarshan office o kam ka·enggipa ong·a ine u·ina man·angaha.
Koborko man·soanigitade ia obosta salni somoio ding·beani gimin chiringchi auna re·ange 2:30 mang bajio ong·aha ine parakataha. Mandeni manggisiko chio balboako nike a·damo donggipa manderang bikan a·gaona saldoate donaha.
Sianggipa mandeni manggisiko Tura Civil Hospital ona ra·ange doneaha jekon knal salo post portem ka·gen ine parakataha. Nanggipa sing·sandianirangko police rang dakangkuenga aro koborko chu·gimik man·ani ja·mano parakatna ka·dongsoenga.
