Tura bazar-ni merong dealer saksa Pintu Prasad ni kosako badi ka∙doaniko man∙e pulis dolrang Budbar attamo sing∙sandianirangko dakna rim·angaha ine ma∙sina man∙aha. Public Distribution System (PDS) nigita manderangna sualna chamatgipa merongko sokatgija kamrangko ka∙anina gipin dealer rang uni kosako matnange badi ka·angaha.
Prasad-ni kosako badi ka∙aniko man∙e kakketgipa am·sandianirangko dakangenga ine West Garo Hills-ni Superintendent of Police Dr. Dara Aswaghosh u·iatangaha.
Pintu Prasad merong Company-ni Manager ong·e kamko ka·e bang∙a merongrangko Garo Hills-ni dingtang dingtang merong sualgiparangona garirango gate salruraataniko nikgenchimoba dealer-rangona merongrang sokangjaha ine pulis-rangna badi ka∙anio janapangaha.
PDS ni jinmana chamatgimin merongrangko Garo Hills o bang∙bata changon sualgija donani gimin man·a kragipa manderang jaantio man∙jaenga aro mittam dealer-rang PDS ni merongko dokanrangna pale namgija merongrangkosa sualaniko dakskaenga ineba janapangaha.
