Tura songjinmao donggipa Catholic toromni gitchambatsranggipa gopramo songgimin chisolrangko ma·sina man·gijagipa manderang cha·unina aro nosto ka·anganina mokordoma ka·doangaha. Ia namgijagipa kamko salni somoio ka·aha jekon bi·sarang nikani ja·mano giljani manderangna kobor on·eaha ine u·iatangaha.
Bi·sarangni agananigitade uamangni kal·grike roengmitingo, cha·ugipa manderang gopramchi napchakgipa ramagitan ratgimin chisolrangko auto gario ra·angako nikaha ine Fr. Arthur parakataha. Obostako ma·sia bakan gopramko nirokeon adita chisolrangko pikbrote cha·uaniko aro gopramrangko nosto ka·e donangako nikaha ine Fr. Arthur agandapangaha.
Sakgipin mandeko gopramni chisamgita ge·gittam chisolrangko chile Balsrigittim jolchina re·angako nikna man·aha. Batanggimin salrangoba bijoli wire rangko, nok rikani aro kam ka·ani bosturangko cha·uangaha ineba parakataha.
Ia ong∙gimin obostani bidingo adita manderangko sing∙aniko dakon, pekgipa bosturangko jakkalgipa chadamberang jak dongnaba gnang ine chanchichipe jolni manderang aro wilwilao songdongenggipa manderang u∙iatangaha. Gopramona pulis dolrangba re·bae niangaha aro kakketgipa ja∙pangko namedake talna sing∙sandianiko dakangkuenga ineba parakatjolangaha.
