Meghalaya State University jean Garo Hills-o donggipa Captain Williamson State University-ko chalaiani bidingo sing·aniko dakon, Vice Chancellor aro skigiparangni gadangrango ka∙nagiparangko rimnapani kamrang matchotna am·engaha ine Education Minister Rakkam Sangma u∙iatangaha. Iani bidingo Lok Sabha election-ni Model Code of Conduct (MCC) ko ra∙galani ja∙manan ka∙na nanggipa kamrangko ka·e nirokanikoba dakanggen ine Sangma aganangaha.
Iako aganengon Tura-o rikmangimin buildingko skotong songe, Shillong songjinmaoba campus-ko done bipek dake kam ka∙aniko dakangna manchiani donga ine ua aganangaha. Indake ong·engon bang∙a kam aro niamrangko ja∙rikna nangani bidingo adita somoirangko nangkugen jekai Vice-Chancellor aro Registrar-rangko rimnape dingtang dingtang department-rangko bikotna nangani gimin re∙baenggipa 2025 bilsionisa admission-rangko on∙e a∙bachengatna man∙gen ine Sangma u∙iatangaha.
Una agreba a∙doko ge∙sa Central University NEHU dongahani gimin, a∙dokni bang∙a college-rangan NEHU baksa bak ong·e on∙gimin course-rangkosa da∙o ra∙gatenga. Iani bidingo mikkangchi State University ba NEHU baksa bak ra∙ani gimin sing·aniko dakon, indakgipa rairangko ra∙na a∙dokni dingtang dingtang college-rangko chalaienggiparangosa pangchakanggen ine Sangma aganchakangskaaha.
