Garo Hills-ni skul aro college-rangni chugipa gadango nadoanio dongjagenchimoba, Tura Don Bosco College Higher Secondary section-ni saksakamkam chadambe Aditya Prasad A∙chik a∙songna rasongko ra∙baaha. MBOSE-ni da∙al pringo porikka resultko parakatanio, Aditya Commerce stream-ni top 10 list-o 3 gipa gadango chu·sokaha.
Aditya jean Mahavir Prasad ni depante, Shillong-ni Laban Bengalee Boys Hr. Sec. School aro St. Anthony’s Hr. Sec. School-ni chatrorang baksa 3 gipa gadangona sokdoe niksengangaha. Ua Economics, Business Studies, Mathematics aro Accountancy subjectrango letter mark-rangko man∙e chu∙gimik 458 markrangko man∙angaha. Aditya Mathematics subject-o 98 mark-rangko man∙e college-o bang∙batgipa mark-ko man∙gipaba ong∙angaha.
Kobor ra∙timgiparangna parakatengon, Aditya uni bimungko top 10-o nadona maming ka·dongsoanirang dongjachim ine aganangaha aro uni ia gadango chu∙sokanina, ua dingtangmancha uni ma∙apaa, college ni skigiparang aro tuition-o skie on∙giparangko mittelpilangaha. Mikkangchi ua B.Com ko poraina manchisoaniko janapan baksana Chartered Accountant-ni porikkao chu∙sokgipa ong∙na tarisamsoaniko dakanggen ine parakangjolaha.
Ia gadango chu∙soknagita Aditya salprako konta 2 somoiko ra∙e poraironga aro poraienggipa chadamberangkoba uamangni chu∙gimik gisikko on∙e poraichina didiani kattarangko aganangaha. Unbaksana poraiani somoio bimchipaniko aro kal∙ani somoikoba dingtangmancha ra∙e an∙saoe donngnaba didiangjolangaha.
