Rongjeng, Mangsang aro Adokgre-ni wilwilao songdongenggipa manderangni palo A·chik Holistic Awakening Movement (AHAM) A·dokgre Regional Unit dingtang mancha Rongjeng, Mangsang aro Adokgre-ona re·gipa ramarangko matchotgija galchipe donanina ta·rake tarie on·china Chief Minister Conrad Sangma-na memorandum-ko on·angaha.
Rongjeng-Mangsang aro Adokgre (RMA)-ni 54 km ong·gipa ramarangko tarina gitcham Chief Minister Mukul M Sangma, 2017 bilsio pangchakani ro·ongko songangaha aro manderangna ku·rachake ka·donganiko on·angaha. Ia project-na Non-Lapsable Central Pool of Resources (NLCPR) aro North East Council (NEC)-ni ning·o gong crore 210 chamatgenchimoba, gong crore 123 ona tang·onataha aro ramarangko tariani Illdek Akong-onasan sokuenga ine AHAM dolrang janapangaha.
Rongjeng-Mangsang aro Adokgre ramarangko tarianirang matchotkujagenchimoba adita salrangna skang dingtang dingtang songbad-rango RMA project-ni kamrang matchotaha ine Kharkutta Constituency-ni MLA Rupert Momin parakataha. Indake kakketgijagipa kattarangko agananirangchi songdongenggipa manderangna suk ong·gijaniko ra·baani ong·a aro kamrangko matchotanirang 20%-ba ong·srangkuja ine janapataha. Ia rama a·dubek aro a·klokrara ong·ani a·sel wachi karini somoirangode re·ruraanio neng·nikanirangko man·enga ine AHAM dolrang aganangaha.
Illdek Akongo RCC dolong rikenggipana tangka paisarangko chamatgenchimoba da·alonaba kamrangko matchotatna man·kujani a·selo songni manderang chi bana ong·ani somoirango chibimako batsotanio names kenaba nangenga. Ia kamrangni dontonganiko nike uamangni RTI ka·anio ia project-na gong crore 12 tangka paisarangko chamatahachim ine u·ina gita man·aha ine AHAM dolrang aganangaha.
Uni gimin ia pilak neng·nikanirangko nirokate RMA-ni project-na a·bachengo gong crore 210 tangkarangko chamatagitan chamatpiltaichina mol·molangan baksana Illdek chibimao tarienggipa RCC dolongko ta·rake kam ka·e matchotatchinaba didiangaha. Iasan ong·aigija Kharkutta Constituency-ni MLA Rupert Momin-ni RMA ramarangko matchotaha ine kakket ong·gijagipa kattarangko agananina manderangna talate on·china AHAM, Adokgre Regional Unit-ni President Marchborn R Marak, Chief Minister Conrad Sangma-ko mol·molangaha.
