September 23 tarik 2025-o India a·songni President Droupadi Murmu ni jakchi ‘Rapture’ ba ‘Rimdogittanga’ jawilwatna National Award ko man·bagipa Director Dominic Megam Sangma aro uni Producer Eva Gunme Marak ko Jengjalo katchabee rimchaksoaniko da·alo dakangaha.
A·chik a·songna mikkim rasongko ra·baanina katchae Baljek Agal songni dilgiparang, Raksam maharirangni dilgiparang aro St. Anthony’s Higher Secondary School Jengjal ni Principal aro skigiparang baksana chatro chatrirang iano bakko ra·e iako ong·atangaha. Indake Jengjalo uko mande ra·aniko daka ja·manba NH51 Rebels ni riders-rangni re·dilanio chang·satai Tura, St. Xavier’s School o uni indake dal·begipa chu·sokaniko kan·dike manina gita St. Xavier’s School ni Principal, skigiparang aro chatro chatrirang tom·chimongangaha. Ia somoio skul ni gita Award ko man·bagipa Director Dominic Megam Sangma aro Producer Eva Gunme Marak ko mande ra·anirangkoba dakange tom·anio bakko ra·giparang uamangni agan ku·pattianio knae ra·angtokaha.
Ku·rongdik ni kobor ra·timgiparang baksa golpoengon, Ma·ama aro Rapture gita dakgipa mingsingbegipa jawilwatko tarigipa Domnic Megam Sangma uni jawilwatrango A·chik jatni daka rika, ganding chinding, jatni dingtang dingtang chinrangko aro a·dokni tangsekgilgilgipa buring bolgrimrangko mesokange uni jawilwatko tarirangaha ine parakataha. Sangma uni 2018 bilso tarichenggipa A·chik jawilwat Ma·ama naba adita bilsirangna skang bang·a Award rangkoba man·angaha. Apsan dake uni gnigipa A·chik jawilwat Rimdogittanga-ni a·gilsak gimiko mingsing minggamgipa ong·ange bang·a Award rangko man·an baksana chang 71-gipa National Award-o Best Garo Film ni bako man·e an·tangna aro A·chik a·songna mikkim rasongko ra·baaha.
Ia award man·aniara jatna bilongen gamchatbegipa ong·a maina an·ching A·chik ku·sikko 8th Schedule-o ra·napaniko man·angkujani gisepo indakgipa award ko man·baaniara A·chik jatni ku·sik aro dakbewal rangko a·gilsak gimikona niksengatani ong·a. Jensalo ia award ko man·ani somoio banga manderangan ia ku·sik, jat aro dakbewal rikbewalko nikangaha jeni bidingo u·ina aro ma·sibatna skaniko nikangna man·aha. Ian a·gilsak ni dingtang dingtang biaprangona A·chik jatni bidingo ma·siatna sokatan baksana ia award-ko man·baaniara namen gamchatbegipa ong·a maina ian an·chingni A·chik Literature Society naba ku·siktangko 8th schedule-o segatatna ja·ku de·anioba dakchakaniko on·anggen ine Dominic Sangma aganangaha.
A·chik a·songni jawilwatrangko tarina gisik nanggipa chadamberangna ku·pattianiko on·engon, a·gilsak aro manderangni mikkango kamrangko mesoknasienganiko janapange, indakgipa somoion mandeara jensalo ia kamrangko ka·na jotton ka·bajokon bilongen kamtangna kakket ong·e kamko ka·na nanga aro an·tangtangni ka·tongo donggipa kattarangko bilakatchengna nanganikoba Dominic Sangma agan ku·pattiange on·angaha.
