South Garo Hills-ni Gare Songmong songo Jal Jeevan Mission (JJM)-na sorkarini chamatgipa tangka paisarangko jakkalsrete kamrangko namgija ka·e on·anina Gare Songmong JJM-ni Contractor, Williamnagar PHE department-ni dilgiparang aro third-party Inspector-ni kosako songni manderang Nongalbibra Police Station-o badi ka·angaha.
Nokantiona chirangko sokatna jakkalgipa pipeline-rangko namgija tarie on·anina aro bang·a nokdangrangan chi jokchakaniko sikteke on·aniko man·kujaenganikoba badi ka·anio janapangaha.
Sorkarini chamatgipa tangka paisarangko jakkalsrete project-ni kamrangna jakkalanide lekka-o mangmangsan ong·aia indiba a·gitalode manderangna ringani chirangko nokantiona sokate on·jaenga ine Tengba Marak aganangaha.
JJM project-ni kamrang matchotgiminrangko galchipe donani a·selo chi ra·chakna rikgipa tank-rango chirangni palo a·dubek aro samsirangni gapchipe donganikosa nikna man·enga ine janapangaha. Unbaksana songni manderangni soi-rangko togie ra·enba chamatgipa tangka paisarangko bikotna jakkalanian cha·bokani kam ong·a ine Marak aganangaha.
Uni gimin ia pilakon nirokate am·sandianirangko dake dosi donggipa manderangni kosako rakgipa ja·kuko de·angchina Tengba Marak aganangaha.
