Git ring·ani a·bao mingsing minggamgipa Zubeen Garg-ni manggisiko gnigipa changna Guwahati Medical College & Hospital (GMCH)-o porikka ra·e nianiko da·al pringo matchotataha. Uni manggisiko bon·kamgipa niamrangko dake Guwahati-oni adita chel·ao donggipa Sonapur-o so·anggen ine parakataha.
Zubeen-ni manggisiko ra·e Sarusajai Sports complex-oni re·jomangaha aro uko so·na skang je biapon bon·kamgipa niamrangko dake so·anggen ua biapon uko gisik ra·na rika cho·anirangkoba dakanggen ine Assam a·dokni sorkari parakangaha. Zubeen-ni sianina Chief Minister Himanta Biswa Sarma baksana Union Minister Pabitra Margherita aro adita official-rang mijal walo duk chakrimaniko mesokangaha.
Ia gnigipa changna post mortem ka·taianiara uni rang·gitik sagalo jromitingo sianina manderangni dabianio aro dingtang dingtang chanchisretanirang nadoahani gimin ong·aha ine Sarma aganangaha. Uni manggisiko siani ja·manon Singapore-on porikka ra·e niahaoba kakket ong·aniko mesokna a·doknigitaba uni jikgipa Garima Garg-ni bilo ka·taiaona sokaha ineba Sarma aganaha.
Uni manggisiko post mortem ka·anio Guwahati AIIMS-ni doctor-rangba dakchakangaha jekon 8 bajioni a·bachengaha. Zubeen Garg-ko mande ra·ani chinko mesokna Assam-ni pilak skul aro college-rangko chipataha aro Kamrup district-ni government office-rangko knalo chipatskagen ine parakataha. Unbaksana uni manggisiko so·na skang je niamrangko dakgen ua gimikko live telecast ka·gen ineba u·iatangaha.
