West Garo Hills-ni Anti Narcotics Task Force (ANTF) dolrang kakketgipa koborko man·soe, Phulbari Police Station-ni ning·o man·gipa Kokaimari jolo Guwahati-oni re·baenggipa Maruti Celerio (gari no. AS 01 FQ 8148) oniko am·sandianiko dakangaha. Uamangni am·sandianio ge 5 sabon donchakgiparango 53.67 gms mangnigita heroin ine chanchichipgipa powder-rangko chipe dongipako man·aha ine parakataha.
Ua gario songrebagipa manderangara gari saltimgipa Noboruddin, Sahidur Islam, Nazim Uddin Laskar, Nurjan Bibi Laskar aro saksa bilsi chu·onggijagipa bi·sa ong·a. Police dolrangni am·sandianirangko dakani ja·mano ia pekatgipa bostuko Guwahati ISBT-oniko ra·chimongbae West Garo Hills a·jani Gomaijhora songni Fazadur minggipa mandena sokatna manchiachim ine u·ina man·aha.
Ua garioniko chu·gimik sak 2 jako donggiparangko rim·aha jemangan Pushkinipara, P.O. Bholarbhita, P.S. Phulbarisongni bilsi 32 ong·gipa Sahidur Islam aro bilsi 39 ong·gipa Nazim Uddin Laskar ong·a. Rim·ako man·gipa manderangko NDPS Act-o pangchake mokordomako ka·ange September 21 tariko Court-ona watataha ine police dolrang parakataha.
Pekatgipa bosturangko badinggipa manderangko u∙igenchimode sepangbatgipa thanaona u·iatpachina ba Police Control Room (PCR) ni mobile numberrang jean +918837423053, +917005530510 aro +919089199064 rangona ka·ate koborrangko on·chinaba WGH-ni Superintendent of Police Abraham T. Sangma sakantikon didiangaha.
