Assam-ni ring·salo mingsing minggambegipa Zubeen Garg-ni sianio hajal-ni hajal manderangni tom·dakaniko nikangna man·angaha.
Robibar-o uni manggisiko Singapore oniko ra·baani ja·mano Assam aro gipin biaprangoni hajal-ni hajal manderang re·bae Zubeen Garg-ni manggisiko nisoe mande ra·ani chinko mesokangaha. Ru·utbea somoirangna ring·salni a·bao bang·a nambegipa aro knatobegipa gitrangko tariange, Garg Assam-ni saksa degipa ong·e dingtang mancha Bollywood-o niksenggiprangoni saksa ong·angan baksana a·gilsak gimikoba mingsingangaha.
Zubeen Garg-ko re·baenggipa Mongolbar September 23 tariko Sonapur ni Dichang Resort sepango bon·kame uni manggisiko so·aniko dakanggen ine Assam-ni Chief Minister Himanta Biswa Sarma Robibar attamo parakangaha. Uni manggisiko Mongolbar pringni 8 bajioni Sarusajai oni Sonapur-ona ra·anganiko dakgen.
Zubeen Garg na Assam a·doknigita kal·imaniko dakangna Mongolbar salona tik ka·angaha ine Sarma u·iatjolangaha. Iako dingtang mancha Robibar attamo a·dok sorkarini Cabinet tom·anio chanchirimange tik ka·angaha.
