Tribal Nation Rider (TNR) dol skanggipa changna West Eastern Motocross Challenge-ko mijal salo Ganol chisam sepango donggipa Dodinanggre songo ong·atangaha. Ia susagrikaniona SBI ni Regional Manager L. Chetri aro Chief Manager Daryl R. Marak mongsonggipa ong·e sokbaaha.
Ia susaaniko pring 7:30 baji mangoni a·bachengataha jekon WGH District Sports Officer Saljagring Marak-ni jakchi flag off ka·aha.
Susagrikani namen an·saobegipa ong·aha jeon Garo Hills aro Khasi Hills-oni chu·gimiko sak 36 rider-rang sokbae bak ra·aniko nikna man·aha. Motocross Challenge-ko dingtang dingtang gadangrang chong·motan Beginners, Novice, Scooty, Two-Stroke, Expert aro Open category-o susaataha.
Ia susaaniko kilometre 1 mang ong·gipa track-o changgni dake salsusaataha. Pilak rider-rang an·tangtangni changa sapako jakkale skanggipa ong·na krengaha aro point-rangko man·a raken jotton ka·angaha. Attamsal bon·ao chegiparangna mongsonggipa sokgiparangni jakchi trophy, certificate aro gadangni kri tangka paisarangko boksisrangkoba on·angaha.
Expert-ni gadango skanggipa ong·gipa Evander M. Sangma, Banshanglang K. Thangmaw gnigipa aro Dame Wangki Aiboklang Suiam gittamgipa biapko man·angskaha. Novice gadango Wankitbok Kharbani skanggipa, Ringrang Gilsang M. Sangma gnigipa aro Sikkim-ni Dago Tshering Gurung gittamgipa biapko man·angaha. Beginners-rangni gisepo Tura Wonders doloni Tengkam Sangma skanggipa, Walsado Ch. Sangma gnigipa aro Chebat Sangma gittamgipa ong·angskaha.
Apsan dake Two Stroke gadango skanggipa biapko Tenzy Sangma, gnigipako Banjoplang Unbah aro gittamgipa biapko Fozor Ali man·angaha. Scooty-rangni gisepo Bregie Riprang R. Marak chegipa ong·aha, Enrich K. Sangma gnigipa aro Wen M. Marak gittamgipa biapko man·angaha. Open category-ko Evander M. Sangma cheangaha aro Chisam Sangma gnigipa aro Walsado Ch. Sangma gittamgipa cheaha.
Salsugrikani bon·kamao dingtangmancha Beginners gadango gnigipa biapko aro Open Category-o gittamgipagipa man·e chegipa Tura K.A. Road ni bilsi 23 ong·gipa Walsado Ch. Sangma-na Best Rider-ni Trophy, Certificate baksana boksisrangkoba on·angaha.
