September 22 aro 23 tarikrango bakrimgipa NGO dolrangni social media-o ramarango walni somoio gari gora re·aniko champengatna am·gipani bidingo Meghalaya Court-ni Case No. WP(C)/SH/127 (2015) o pangchake bandh-rangko ong·ataniara ramram manderangna article 19 aro 21-o on·gimin bilko niam pe·ani ong·a ine WGH Deputy Commissioner Vibhor Aggarwal parakataha.
Ia dongimin niamrangko manigija pe·genchimode Court Act-o pangchake court ja·ku de·na man·gen aro a·dok sorkariba criminal case-ko badi segatna bil man·a ine DC janapataha. Section 163 BNSS-o una on·gimin bilko jakkale gari gora re·ruraaniko champengjachina, sakbongana bate tom·jachina, gol·dik, ro·ong, silchidare aro gipin bosturangko ra·bite dongjachina raken beng·ataha. Ia niamrang kamtangko ka·enggipa sipai dolrangna aro daitoko nirokenggiparangna ong·jawa. Ia ge·etanirang West Garo Hills a·jana gimikna ong·gen ine Deputy Commissioner parakataha.
Walo ramarango re·ruraaniko champengode sosojengjeng ong·aniko ra·bana ba ramram manderangna dongtogijaniko on·aba gnang. Una agreba tom·tomaniko nosto ka·aona, saknaaniko ra·bana, gamjinrangko rusiataona, an·chi pari nikaona aro dakgrik dinggrikaona soknaba donga ine Deputy Commissioner parakataha. Uni gimin so·sojengjeng ong·aoniko champengna aro tom·tomaniko rakkina ia ja·kurangko de·na nanga ine Deputy Commissioner Vibhor Aggarwal janapataha.
