University of Science & Technology Meghalaya (USTM) ko forest-ni a·arangko niam gri sinchepe ra·aha ine matnanganiko Meghalaya sorkari raken jegalate Supreme Court-na aganchakaniko on·ataha. Re·anggipa somoio Central Empowered Committee (CEC) ni Supreme Court-na janapatani ja·mano pilak report-rangko niangmane batanggimin Budbar salo forest-ni a·arangko niamni a·palo maming ra·chakani gri sinchepe ra·aha ine USTM-ko 150.35 crore tangkarangko dai gamchina tik ka·ataha.
Meghalaya sorkari aganchakaniko on·atengon, ia a·arangko USTM-na niamni ning·aon aro pilak ong·gija dakanirangko ka·janagitaan u·i ma·sichengen on·aha ine parakatskaaha. Meghalaya a·doko forest-ni a·arang sorkarisan ong·aigija district council-ni ning·oba ga·aka aro iako chu·batgipa court-ba u·ia ine talataha.
Meghalaya sorkari ia aganchakaniko Jitul Deka-ni ma·mong aro gipinrang baksa Chief Justice ni mikkango badi ka·doanina India-ni Supreme Court-ni ge·etataniko man·e aganchakaniko on·ataha. Iani bidingo October 8 tariko hearing ong·taigen.
Ia 60.0586 hectare a·arangko Ri-bhoi a·jaona kingking km 10.4 mangko NETC-ni 400KV line-ko salangnasa jakkalaha jean da·o USTM-ni ning·o ong·skaaniko sorkari talataha. March jao Chief Minister Conrad K. Sangma-ba Assam-ni CM Himanta Biswa Sarma-ni USTM-ni kosako a·arangko sinchepanina matnanganirangko media-na aganengon raken jegalangaha.
A·brirangko cho·ani a·sel Guwahati-ni adita bakrangko chi bana ong·atenga ine matnanganikoba Meghalaya sorkari jegalataha. Guwahati-o chi skonganiara rika cho·anirangko ta·rake dakengani, name chanchichenggija kamrangko ka·ani aro kraagita nalarang dongjani a·selosa ong·enga ine sorkari aganangaha. Unbaksana Guwahati chi skonge dongna altugipa biapba ong·a ine
Meghalaya sorkari parakataha.
USTM-na gong crore 150.35 tangkarangko gamna agangipara a·ani damko nigrike, bolrangko den·peanina, compensation, a·arangko taripiltaiani, nosto ka·ani aro bolrangko ge·pilna nangani pilakko nigrike gamna tik ka·ataha.
