North Garo Hills a·jao gamchatgipa ramarangko namdapatna aro adita ramarangko ta·raken taritaipilna nangengani gimin Timothy Shira-ko cabinet-ona rim·napachi a·jao rama jal·angrangko tarina ka·dongsoaniko Kharkutta-ni MLA parakataha.
North Garo Hills a·jao cabinet minister-ko bilsi 15-ni ja·mano man·taianina Chief Minister Conrad Sangma-ni Timothy Shira-ko cabinet-ona rim·napanina Momin mittele aganangaha.
Resubelpara-ni MLA Timothy D. Shira batanggimin salrango Meghalaya Assembly session-o Deputy Speaker-ni kamko wataha. Shira da·o Tourism, Agriculture aro Fisheries Department-ni Minister-na seokako man·skaaha. Momin an·tangan Meghalaya New and Renewable Energy Development Agency (MNREDA)-ni Chairman-ong·e a·jao ramarangko ta·raken taridapna nanganirangko talate on·angaha.
Mendipathar-Songsak re·gipa German technology-ko jakkale tarigimin ramarang jregipa truck garirangni Mendipathar railway station-ona re·ruraani a·selo nosto ong·anina aro Resubelpara-ni 100 bed Hospital-ona dakanggipa ramako gital dake tarina nanganiko Momin aganangaha.
Kharkutta-Darangiri aro Mendipathar-Krishnai-ona dakanggipa ramarangni namjani a·selo salantio palna nanggipa bosturang jekai te·rik, gue aro sal·arangko ra·anganio songdongenggipa manderang neng·nikanirangko man·enganina tarina nangchongmotaniko Momin janapangaha. Adokgre aro Mangsang ramarangko tariani adita matchotaniko nikna man·enga, da·o Mendipathar aro Songsak ramarangko tarina sorkari tangka paisarangko chamat man·aha ine Kharkutta-ni MLA Rupert Momin aganangaha.
