GHADC, Executive Committee (EC) ni ja 10-ni dormaharangko on·a tik ka·aniko Non-Gazetted Employees Association (NGEA) ra·chakna jechakaniko mijal salo parakataha. Ia dormaharangko ra·chakgija man·a nangkuenggiparangko matchote on·ja dipet uamangni tom·tome jingjengatenggipakon dakangkunaba parakangaha.
Iani bidingo NGEA mijal salo dingtang dingtang member-rang aro ka·rimskarang baksa tom·e chanchirimenba office-o a·songtaina skang ja 10-ni dormaharangko ra·chakna jechakenba chu·gimik man·a nanggiparangko on·skachina dabiangaha. Mijal salo Executive Committee-ni uamangna see janapatgipakoba jinma ku·mongenba apsan miksonganio re·mikkangna tik ka·angtokaha.
Unikoa, NGEA-ni dilgipa Brithen Sangma, EC-na bikpangpil lekka see on·angskana parakangaha.
Council-o ong·enggipa neng·nikanirangni bidingo mijal salo Tura circuit house-o GHADC reforms sub-committee warachakgipa MDC-rang, dingtang dingtang Civil Society Organisation (CSO) rang aro gipin dolrang baksa tom·aniko dakangaha. Ia tom·anio GHADC-o ong·enggipa obostarangko ta·raken namate on·china didiangenba bang·a jajaanirang u·igijanirangko sing·doangahaa aro ku·pattianirangkoba on·angaha.
