Garo Hills Autonomous District Council (GHADC) o dormaharangko on∙a man∙gija neng∙nikanirangko man∙enggipako namatnagita mijal salni bako Tura, Circuit House-o West Garo Hills a∙jani Deputy Commissioner Vibhor Aggarwal ni dilanio GHADC Reforms Sub-Committee District Council ko chalaienggipa MDC rang, warachakgipa dolni MDC-rang aro Civil Society Organisation-rang baksa chanchirimaniko dakangaha.
Sub-Committee skanggipa tom∙aniko pringni 10 baji mango GHADC-ni MDC-rang baksa dakangaha. MDC-rang baksa tom∙anio a∙dok sorkarini council-na bail-out package-ko on∙e council-ni neng∙nikaniko namatani bidingo chanchirima baksana namdapatani cholrangko ba dingtangatanirangko GHADC-na nangani bidingo golporimaha. Ia somoio MDC rang dormaharangko on∙ani bidingo aro gipin jaajani ba u∙igijani aro sing∙doanirangko sub-committee ni mikkango donangaha.
Apsan dake attam 2 baji mango Sub-Committee bang∙a adita Civil Society Organisation (CSO) rang baksa tom∙e chanchirimaniko dakangaha jeon uamangba sing∙na nanganirangko aro jaajanirangko sub-committee ni mikkango parakangaha. CSO dolrang council-na chamatgipa tangka paisarangko jakkalsretaniko naljoknagita escrow account-rangko tarichina ku∙pattianiko on∙angaha. Una agreba CSO-rang GHADC-o ong∙enggipa obostarangko ta∙rakale namate on∙chinaba didiangjolaha.
West Garo Hills a∙jani Deputy Commissioner Vibhor Aggarwal MDC-rang aro CSO-rang baksa tom∙ani ja∙mano media-na mikkang pa∙e aganengon da∙o council-o ong∙enggipa obostarangko ta∙rake namatchina ku∙cholsan ong∙e dingtang dingtang nangnikanirangko uamangni janapaniko parakangaha. Uamangni chanchianirang, sing∙doanirang aro ku∙pattianirangko sub-committee a∙dok sorkarina u∙iatanggen ine Deputy Commissioner aganangaha.
Kobor ra∙timgiparangna parakengon, a∙dok sorkari Sixth Schedule-ni niamko aro GHADC-ni jakgitele kam ka∙aniko maming dakeba a∙kangna aro bon∙atna miksonganirang dongja ine DC talatangaha. Iani bidingo tom∙aniko dakani somoioba bakko ra∙giparangnaba changni chang u∙iataha ine ua aganangkuaha. Tangka paisa aro una agre je dakgipa ja∙kurangko de∙genchimoba council-ni bilko mande ra∙a gnangsa dakanggen ine ua agandapangaha.
Attamni bako sub-committee dingtang dingtang dolrang jekai GSU, FKJGP, AYWO, AHAM, ADE, AAYF, ACHIK, Mother’s Union, ANY aro gipin CSO dolrang baksa tom∙aniko dakangaha.
FKJGP ni Pritam Arengh, media-na talatengon bail-out package-ko on∙a tik ka∙aniko namnike ra∙chakaniko parakangaha. Indake ong∙genchimoba a∙dok sorkarini jaanti council-na dormaharangko on∙a tik ka∙aniko ua ra∙chakna man∙jae jegalangskaaha. Ian constitution-ni niamko aro council-na on∙gimin bilko pe∙ani ong∙gen ine Arengh aganangaha.
Una agreba bail-out package ba man∙a nanggipa dormaharangko on∙a chanchiengon ia chamatgipa tangkarangkora banoniko on∙gen aro banoni sokbagen ine sing∙doangaha. Unbaksana, sorkari indita tangka paisarangko on∙a nangengon maikai sinjetani gri chu∙sokatgen ine sing∙doanikoba dakangaha.
Chanchirimaniko dakdilenggipa sub-commitee council-o da∙o man∙enggipa neng∙nikanirangko namatna aro mikkangchi GHADC-ko nambata gadango jakgitel ong∙e name kamrangko ka∙na man∙agita pilak chanchirimaniona re∙bagiparangni ku∙pattianirangko ra∙e a∙dok sorkarini mikkango done ong∙enggipa obostarangko namdapatna kam ka∙angen ine parakangaha.
