Cabinet Minister ong·aoniko rang·san ra·galanina, gitcham Health aro Agriculture Minister Ampareen Lyngdoh aiao inmanan baksana uni suk ong·gijaniko parakangaha. Lyngdoh uni suk ong·gijaniko aganengon uni indita changni chang Chief Minister Conrad Sangma-o sing·aniko dakomangba uko ra·galna mamingkon u·iatsojaha ine aganaha.
Chief Minister-ni agananiko man·e Lyngdoh New Delhi-ona National Rabi Campaign conference ong·gipao bakko ra·na re·angani somoio uko ra·galani chittiko uni nokona sokataha ine ua u·ina man·aha. Indake ong·engon Chief Minister baksa pangnan golporime conference-chi re·ange bakko ra·ena nangama nanggijanikoba sing·aha ine Lyngdoh aganaha. Unbaksana uko ra·galna miksongani maming chinkoba on·jaha ineba Lyngdoh aganangaha.
A·bachengode ua chittiko nikjaha maina ua chitti gipin chittirang baksa uni noko donbrinaha jeon indakgipa nangchongmotgipa kattarangko una mamingkoba u·iatsogija chittikosan watataiahanina aiao inmanaha ine Lyngdoh parakangaha. Unbaksana Cabinet Minister rangko dingtangatna CM-ni gisiko chanchianiko changni chang sing·omangba uko ra·galna miksonganiko maming dakeba janapangjaha ine Lyngdoh parakataha.
Indake ong·engani gisepon uko ra·galgen ine u·isogenchimode Delhi conference-o bakko ra·ejawachim ine Lyngdoh aganaha. Jensalo gnigipa salo uni Union Agriculture Minister baksa tom·anio dongna nangmiting somoion gitalgipa Cabinet Minister rangko ku·mikchetatna sal tik ka·anikosa niksona man·aiaha ineba Lyngdoh aganangaha.
Indake maming golporima gri aro u·iatani gri Minister-ni kamoniko ramram ra·galaniara uni constituency-ni manderangko kratchaataniba ong·a ine Lyngdoh aganangaha. Una agre sing∙anirangna aganchakna skang ua ia pilak ma∙sisretaniko changsatai Chief Minister baksa golporimangchenggen ine Lyngdoh agandapangaha.
