Da∙al salni bako Tura Mission Compound Working Women’s Hostel-o A·chik Literature Society (ALS), Tura uamangni Annual General Conference-ko ong∙atangaha.
Ia conference-ona Meghalaya Legislative Assembly-ni Speaker Thomas A. Sangma mongsonggipa ong∙e sokbaaha aro NEHU Tura Campus-ni Pro-Vice Chancellor Prof. Fameline K. Marak-ba bakko ra∙angaha. Una agreba ia tom∙aniona chatro chatrirang, lekka segiparang, poraiani a∙bao kragipa gadango donge kamko ka∙enggiparang, scholar-rang aro jatni sea jotaniko ripingna gisiko nanggiparang sokbatokaha.
Mongsonggipa sokgipa Meghalaya-ni Speaker Thomas A. Sangma tom∙anio somoiko ra∙e aganengon, dingtang dingtang gadango donge A∙chik ku∙sikko ripingna gisiko nange kamko ka∙enganina ALS-ko mittelan baksana rasongko on∙angaha. Unikoa ku∙siktangko ripingna ALS san kamko ka∙aigija pilakkon ku∙cholsan ong∙e kamko ka∙china Sangma didiangjolaha.
A∙gilsako aro India a∙songoba banga ku∙sikrangni gimaenganiko nike A∙chik jatba ku∙tangko ripingna maming ja∙kuko de∙jagenchimode mikkangchi gimaona soknaba gnang ine Sangma aganangaha. Ian jatna aro a∙song chigana dal∙a gimaani ong∙gen ine Sangma mikrakaniko on∙angaha. Da∙o ong∙enggipa sorkariba Conrad Sangma-ni dilanichi Garo aro Khasi ku∙sikko constitution-ni Eighth Schedule-o ra∙napna raken kam ka∙enga ine Sangma aganangkuaha.
Ia somoio mongsonggipa sokgipani jakchi lekka ge∙gniko chong∙motan Lewellyn R. Marak ni segimin ‘Goerani Mil∙am’ aro Anitha Ch. Marak ni segipa ‘Amani Golporang’ ki∙tapko oprakangaha. Apsan dake tom∙ani bako PhD poraia matchotgipa chatro chatrirangkoba ALS-nigita mande ra∙aniko dakangtokaha.
Conference-ni gnigipa bako A∙chikrangni dakarikani bidingo mongsongbate ‘Chawari Sing∙a’ aro ‘Nokchame Gaa’ ni bidingo dingtang dingtang jolo daka rikaniko golpo chanchirimangaha. Una agreba A∙chik ku∙sikko India a∙songni Constitution-ni Eighth Schedule o segatatna aro A∙chikkuko Meghalaya a∙dokni State Language ong∙atnaba dabianiko dakna tom∙ani bako chanchirimaniko dakangaha.
