Meghalaya a·doko BJP ko seoke sorkariko rikna cholko on·genchimode ILP na dabianiko chu·sokatna man·aba donga ine aganan baksana Khasi-Jaintia Hills-o railway ko ra·bana dingtang mancha NGO dolrangko name dake nipiltaie chanchiangchinaba gitalgipa Cabinet Minister aro BJP ni MLA Sanbor Shullai aganangaha.
Budbar salo kobor ra·timgiparangna aganengon, BJP dolna cholko on·e sak 31 MLA rangko seokange bilsi bongana sorkariko rikna on·genchimode salsao ILP ko man·aba donga ine Shullai parakataha. Iako aganengon, ILP ko ra·gatani kamara ma·mong sorkarini jakosa ong·a indiomangba Delhi-ona re·anga changantian anga Minister rangko aro dilgiparangko gronge iani bidingo janapbaronga ineba Shullai aganangaha.
Railway ko ra·baaniko champengsoanina, Shullai dingtang mancha NGO aro gipin dolrangko name dake chanchirime ja·ku de·angchina didiangaha maina iako ra·baanichi Byrnihat-ona goods train ko man·bana dakchakanggen ine u·iatangaha. A·dokko Chief Minister Conrad Sangma ni dilanio mikkangchi NGO rang baksa apsan tom·e chanchirimaniko dake uamangna namgipa ku·pattianirangko on·aba jotton ka·anggen ine Shullai agandapangaha.
