Da·al attamo Chandmari, Govt. Boys Hr. Sec. School ni robol kal·chakram biapo Inter Mahari Robol kal·susaaniko ong·atengon Manda mahari baksa Cheran mahari quaterfinal-o susagrikangaha.
Uandake ia kal·susaanio dol gnian bilongen nambegipa susagrikani gisikrangko mesoke, an·tangni doltangtangko ong·nasienggipa Semi-final gadangona doatna rakbee jotton ka·angaha. Susagrikani bako skanggipa goal ko Manda maharini Wegasal M Sangma 4 gipa minute·o skochi robolko totdape doltangna skanggipa goalko chipe on·angaha. Apsan dake 27 gipa minute-o Manda maharina Mittilson M Sangma gnigipa goalko chipe on·angskaaha. Indake ong·engon Cheran mahari kal·susaani skanggipa bako goalsakoba chipna man·angjaha.
Susagrikani gnigipa bako goal gniko chipe dongsoenggipa Manda mahari apsan bimchipani gnang nambee kal·anganichi 37 gipa minute-o Mittilson M Sangma changsatai free kick rongsako chipnapan baksana 38 gipa minute-o Manda mahari dolni Chenik Ch Marak doltangna 4 gipa goalko chipe on·angtaiaha.
Rasongribee kal·susaani bon·kamao Cheran Maharirang goalsakoba chipna man·angjaha aro uandake Manda mahari 4-0 goal chi da·alni quaterfinal susagrikanio kal·e chegipa ong·enba Semi-final gadangona doangaha. Uandake da·al salni susagrikanio Manda maharini Mittilson M Sangma na goal gniko doltangna chipe on·a man·ani gimin una player of the match boksisko on·angaha.
Da·o ong·nasienggipa Semi-final susagrikanirangko niatgenchimode me·chikrangni gisepo Mangsang mahari baksa Dangsu maharirang September jani 18 tariko susagrikanggen aro Mrong mahari, Gabil mahari baksa September 22 tariko susagrikangskagen. Uandake me·asa dolrangko niatskagenchimode September 20 tariko Chambugong mahari baksa A·we mahari susagrikangen aro apsan daken Te·gite mahari da·alo cheanggipa Manda mahari baksa September 24 tariko kal·angskagen.
Ia pilak Semifinal kal·susagrikanirangko Mahari Football ko a·bachengatani somoio a·jani District Sports Officer, Saljagring M. Marak ni aganagitan Tura, Dakopgre ni P.A. Sangma Stadium-o ong·atanggen.
