National People’s Party (NPP)-ni dilenggipa Meghalaya Democratic Alliance (MDA) sorkari me·chikrangni dilgipa ong·e re·dilaniko dal·e ra·gija kamrangko ka·enga ine Meghalaya Pradesh Mahila Congress (MPMC)-ni President Joplyn Shylla matnange aganangaha.
Ia kattarangko Ampareen Lyngdoh-ko cabinet minister-oniko ra·galani ja∙mano Chief Minister Conrad Sangma-ni gitalgipa sak 8 cabinet minister-rangko seokanio me·chik dilgipako rimnapjanina Shylla aganangaha.
Kobor ra·timgiparang baksa agangrikengon me·chik dilgiparangko minister-ni kamna dongijanian sorkarini matrilineal society ba me·chikko nokna donani gamchataniko dal·e ra·gijaniko mesoka ine sorkarini tik ka·gimina suk ong·gijaniko Shylla parakangaha.
A·doko dingtang dingtang kam ka·anirango me·chikrangni bakko ra·anirang me∙asarangna batgenchimoba, indake Council of Minister-rango me·chik dilgipako rimnapgijaniara onchepe ra·ani ong·enga. NPP-BJP sorkari cartel politics ba sapgiparangko rimnapgija an∙tangtangni namnikatangrangko mangmang tang∙doate, me·chikrangni ku·rang on·anirangko mitino donan baksana a·dokni daka rikani aro jatni bewalrangna simsakgija kam ka∙enga ineba Joplyn Shylla matnange aganangaha.
Unbaksana, Cabinet-o noktangni dilgiparangko seokanian “Family politics” ko ja∙rikenga ine MPCC ni Secretary Manuel Badwar matnangataha. Ian an∙tangtangna namgnina kam ka∙ani ong∙a aro manderangni nangnikaniko nigrike kam ka∙gijaniko nikna man∙enga ineba ua aganangaha.
