Bilsi 4 ong·gipa me·chik bi·sako so·otani bidingo nambate am·sandianirangko dakchina aro ta·rake nanggipa ja·kurangko de·e nokdangni manderangna kakket bichalko ra·bae on·e matchotatchina Meghalaya State Commission for Protection of Child Rights (MSCPCR) a·dokni police-rangko didiataha.
Sianggipa bi·sa re·anggipa Robibar salo gimaaha aro salgipino uni nokni sepangjoloniko chong·motan Nongrah Nonglum gittimoniko uni manggisiko nikaha. Bi·sani manggisiko kang·kareo ro·ong onjete donangako gital rikenggipa nokoniko mikka chi skonge donggipa ka·magipa a·paoniko man·aha. Chonbegipa bi·sako ka·saninggija so·otaniko name am·sandinagita Special Investigation Team (SIT)-ko SP Herbert Kharkongor-ni dilachini bikotaha.
Ia obostani bidingo ta·rake aro nambate am·sandianiko dakanichi kakket bichalko ra·baanisan ong·aigija dukko man·e dongenggipa nokdangni manderangnaba gisikni bilgrianiko namen ritchengatani ong·gen ine Commission aganangaha. MSCPCR dolrang dukko man·e dongenggipa nokdangona re·ange grongeaha aro manggisiko NEIGRIHMS-o post-mortem ka·anirangni bidingoba nirokatenga ine koborna parakataha.
