South West West Garo Hills a·jani pilak bading chiwalchakgipa biaprang jekai hotel-rango, restaurant-rang, cha dokan, canteen aro sorok sambarango dokan dakgiparangna domestic LPG cylinder-rangko jakkalaniko dontongate commercial cylinder-rangko jakkalskachina SWGH-ni Deputy Commissioner Hema Nayak aganangaha.
Domestic LPG cylinder-rangko bading chiwalani dingtang dingtang nanganirangna jakkalanian violation of clause 3.1(C) & 7(C) of LPG (regulations of supply & Distribution) order 2000-o ga·aka jean dongimin niamko peani ong·a ine u·iatangaha. Ia niam-o pangchake ma·mong sorkari Ujjuala customer-ba man·a kragipa manderangna subsidy rangko on·e tangka paisarangnigita neng·nikgipa nokdangrangna noko songna channa Domestic LPG cylinder-rangko komigipa damrango bree jakkalna cholko on·angenga ine DC aganangaha.
GST ra·anio domestic cylinder-rangna 5% aro commercial-na 18% tax-rangko ra·ani gisepo bading chiwalgiparangni domestic cylinder-rangko jakkalanichi sorkarini kajina man·anirangko noksan ong·atenga ineba Deputy Commissioner aganangaha. Indake dakaniara bading chiwalgiparangni gisepoba apsangrik ong·e susaanikoba nosto ka·a maina domestic aro commercial LPG cylinder-rangko jakkalanio namen dingtanggrikani ong·a.
Indian Oil Corporation Ltd (IOCL)-ni ge·etgimin niamrangko ja·rike bading chiwalaniko apsangrik dakna, kajina man·aniko rakkina aro manderangna naljokaniko on·a ong·a ine Deputy Commissioner Hema Nayak ka·dongataniko aganangaha.
