Manipur a·dokona Kuki aro Meitei songdonggiparangni 2023 bilsioni kajia ong·e so·sojengjeng ong·aoni skanggipa changna India-ni PM Narendra Modi-ni re·angani somoio Union Territory-ni bimango dingtang administration dakatchina Kuki-Zo Council (KZC) memorandum-ko on·angaha.
Kuki-Zo Council ge·sa Kuki-rangni nangnikanirang aro neng·nikanirangko ku·rang on·enggipa mikkang ong·e kam ka·enggipa ge·sa dol ong·a. Manipur a·doko so·sojengjeng ong·aniko tom·tomaona ra·bana uamang ma·mong baksa agangrikanirangko bang·a changon dakangaha. Da·o uamang a·bri jolni jatrangna ma·eke dingtang administration-ko on·skachina PM Modi-o mol·molangaha.
Prime Minister, Manipur a·dokona bilsi 2 tong·sa ong·pilosa 2023 bilsioni re·anggipa Sonibar salo skanggipa changna ga·tapeaha. Uni sokbaanian Manipur-ni manderangna katchaaniko ra·baan baksana tom·tomanina nisengsoaniko chu·sokatna ka·donganiko on·gipa ong·aha. Ian itihas-o namen gisik ra·na kragipa aro manderangni nisengsoe dongenggipa ong·a ine KZC-ni ku·watimgipa Ginza Vuelzong aganangaha.
