Tura-Damalgre re·gipa ramao mongsongbate Wakkagre aro Lower Damalgre jolo niam gri jabolrangko galgipa biapko da·al salo jinma ku·monge rongtalataniko dakange manderangko rongtal an·tale dongnagita mikrakataniko on·angjolaha.
Ia mikrakatani campaign-ko Rerapara C&RD Block baksana Damalgre United Youth Welfare Society (DUYWS) bakrime ong·atangaha. Manderangni niamgri jabol galaniko aro chaktogijagipa bibana bang·a jegalanirangko janapaniko man·ani ja·mano uamang ia kamko ja·ku de·angaha.
Ia ramani samtangtango buring bolgrimrara dakgipa aro nok jam donggijagipa biap ong·ani gimin Tura aro sepangjolo donggipa manderang niamngri jabolrangko galchakna jakkalaha. Iani a·sel salantio ia ramako re·ruragiparangna aro sondonggipa manderangna jabolni bibarang senganichi neng·nikanirangko man·enga ine songni manderang matnange aganangaha.
Ia rongtalataniko ong·atanio South West Garo Hills DRDA-ni ADC & PD R.Z.D Shira , SWGH-ni AC aro Rerapara-ni BDO Armand Ch. Marak, Damalgre Police Station-o kam ka·giparang, Village Employment Councils (VECs), songni dilgiparang, songni me·chikma dolrang aro chadamberangba bakko ra·angtokaha.
Ia rongtal an·talatanio ge 50 jabol galchakgipa monarango chimonggimin jabolrangko Tura Municipal Board (TMB)-ni gari-o galchina gatataha. Indake ia ramarango niamgri jabolrangko galaniko nikgenchimode niamgita uni kosako rakgipa sastiko on·angna official-rang aganangaha.
