Shillong Nongrah-o bilsi bri ong·gipa me·chik bi·sako ka·saninggija so·oatanina Chief Minister Conrad Sangma suk ong·gijaniko parakate name am·sandianiko dakchina ge·etataha. Ia kattarangko Sangma social media-o parakataha.
Bilsi bri ong·gipa me·chik bi·sa Insaphira Lyngdoh Mawnai Robibar pringni somoio noktangni a·palo kal·e romitingo gimaaha. Uni gimaa bikan bi·sako sandibeoba man·jae nokni manderang police-rangna koborko on·ate am·sandianirangko dakangaha.
Sandianiko dakani bako ia me·chik bi·sako mijal pringo so·otgimin manggisikosa gittimtango nok rikenggipao rong·te sinjete gale donangako man·skaaha. Ian mikka bitchirang ga·ake chirang joksruanichi darangchiba man·pakanggija ning·ao napsrime dongnagita dakaha ine parakataha.
