NPP ni dilenggipa Meghalaya Democratic Alliance (MDA) sorkari bilsi gni ata mang on·gani gisepon a·dokni Skotong Minister Conrad K Sangma cabinet o adita dingtangatanirangko ra·banaba donga ine koborrangko man·angaha.
Cabinet o dingtangatanirangko niksona ka·dongsoengon ia coalition-chi rikenggipa sorkariko nambate chalaina man·agita adita cabinet minister-rang gital mikkangrangna ba gipin dilgiparangna an·tangtangni biaprangko wate on·a nangnaba donga. Indake ong·engon biaprangko wate on·giparang National People’s Party (NPP) aro MDA dolni gipin partyrangoniba dongnaba donga ine koborrangko man·soaha.
NPP doloni Education Minister Rakkam A. Sangma aro Food and Civil Supplies Minister Comingone Ymbon an·tangtangni biapko wate on·a nangnaba donga ine kobor man·soani gnang. Apsan daken UDP dolni Revenue and Disaster Minister Kyrmen Shylla, BJP dolni Animal Husbandry and Veterinary Minister AL Hek, aro HSPDP dolni Sports and Youth Affairs Minister ong·enggipa Shakliar Warjri ba gitalgipa mikkangrangna biapko wate on·aba donga ine koborrangko man·soaha.
Kobor on·timgiparangni janapagitade, Resubelpara-ni MLA aro NPP doloni Timothy D Shira, jean ru·utgija salrangna skang Deputy Speaker gadangko wate on·angahachim, ukoba da·o ong·enggipa Education Minister Rakkam A Sangma ni biapo Cabinet ona rimnapnaba donga ine u·iatangaha.
Unbaksana NPP dolni Jowai ni MLA Wailadmiki Shylla, BJP dolni South Shillong ni MLA Sanbor Shullai, UDP dolni Mairang-ni MLA Metbah Lyngdoh aro HSPDP dolni Mawshynrut ni MLA Methodius Dkhar koba cabinet-ona rimnapnaba donga ine koborna u·iatangaha.
