Nepal a·songo adita salrangna so·sojengjeng ong·anio sorkariko chalaianggipani dilgiparang kamtangko wate katangani gisepo a·songko dilna gitalgipa Prime Minister na Sushila Karki ko seokangaha. Bilsi 73 ong·gipa Sushila Karki Nepal a·songni gitcham Chief Justice ni kamko ka·angaha jean India a·songni Banaras Hindu University (BHU)-o poraiangaha aro da·alo ua a·songko gital dake re·dilna Prime Minister ni kamko jako ra·e ka·na Nepal-ni President Ram Chandra Paudel-ni mikkango ku·mikchetangaha.
Karki gipin dilgiparang baksa tom·aniko dake sorkariko chalaina chanchirimaniko dakanggen. Ua ia sorkariko election ong·kuja dipetna chalaianggen.
Nepal a∙songo ge 26 social media platform rang jekai Facebook, WhatsApp, Snapchat, Instagram, YouTube, X aro gipinrangko manderangni jakkalaniko rang∙san dontongatna rai on∙anina aro tangka jakkalsretanirang bang·ani a·sel sorkarini kosako September 8 tarikoni 9 tarikona chadambe aro manderang chakate ra∙ken jegale jingjengatangaha.
Indake jingjengatani ja∙mano Nepal a∙songni Prime Minister K.P. Sharma Oli an∙tang singhason-ko September 9 tarik 2028-o wate katangna nanga-ona sokangpilaha. Ia so∙sojengjeng ong∙anio sak 19 manderang an∙tangtangni janggirangko gimaatna nangao sokangaha jeonin mongsongbate dambe gisikrang ong∙a aro sak 400 rangnigita saknaako man∙tokaha ine u∙ina man∙aha.
